Awgrymwch y wefan hon i ffrind


6 Ionawr 2009

HELP A CYNGOR

Cwestiynnau ac atebion ynghylch derbyn hysbyseb goryrru:
Rwyf wedi derbyn hysbysiad am oryrru – pam?
Mae eich hysbysiad yn cyd-fynd â strategaeth yr heddlu i wneud y ffyrdd yn fwy diogel i bawb sy’n eu defnyddio. Mae Siwrne Saff yn fenter lleihau cyflymder a gafodd ei sefydlu gan Bartneriaeth Lleihau Marwolaethau ac Anafiadau ar Ffyrdd Gogledd Cymru yn unol â pholisi’r llywodraeth. Nod y fenter yw cynorthwyo i ostwng nifer y bobl sy’n cael eu lladd a’u hanafu ar ffyrdd Gogledd Cymru.
Rwyf wedi derbyn Hysbysiad o Fwriad i Erlyn, beth fydd yn digwydd rŵan?
 Ar ôl i chi dderbyn Hysbysiad, fel ceidwad cofrestredig y cerbyd/y gyrrwr a enwyd mae’n rhaid i chi lenwi’r ffurflen. Bydd y Swyddfa Docynnau Ganolog yn prosesu’r ffurflen ac yn y rhan fwyaf o achosion byddant yn anfon Cynnig Amodol atoch. Mae’r Cynnig Amodol yn rhoi cyfle i chi dalu’r ddirwy neu ddewis mynd i’r llys.
Fi yw’r sawl y cyfeiriwyd y ffurflen ato/ati a fi oedd gyrrwr y cerbyd. Beth fydd yn digwydd rŵan?
 Mae’n rhaid i chi GWBLHAU’R adrannau perthnasol a LLOFNODI RHAN 7 o’r hysbysiad amgaeedig. Dychwelwch yr hysbysiad i’r Swyddfa Docynnau Ganolog o fewn 28 diwrnod. Yn dilyn hynny gan amlaf cynigir cosb benodol o £60.00 a 3 pwynt cosb ar eich trwydded yrru.
Fi yw’r sawl y cyfeiriwyd y ffurflen ato/ati a fi oedd gyrrwr y cerbyd, ond rwyf wedi colli/ni allaf ddod o hyd i’m trwydded yrru. Beth fydd yn digwydd rŵan?
Mae’n rhaid i chi GWBLHAU’R adrannau perthnasol a LLOFNODI RHAN 7 o’r hysbysiad amgaeedig. Dychwelwch yr hysbysiad i’r Swyddfa Docynnau Ganolog o fewn 28 diwrnod. Mae’n rhaid i chi hefyd wneud cais AR UNWAITH am drwydded yrru newydd. Dim ond Trwyddedau Cerdynllun sy’n cael eu cyhoeddi gan y DVLA. Os mai dyma’r tro cyntaf i chi wneud cais am drwydded cerdynllun bydd yn rhaid i chi lenwi Ffurflenni D1 a D750 sydd ar gael o Swyddfa’r Post.
Nid fi oedd y gyrrwr; ffrind/perthynas sydd yn byw dramor oedd yn gyrru?
 Os yw’r sawl a enwyd fel gyrrwr y cerbyd ar adeg y trosedd honedig yn byw dramor, byddwn yn gofyn am brawf o yswiriant a/neu fanylion hedfan.
Nid fi oedd yn gyrru, ac ni wn pwy oedd yn gyrru, beth sydd yn rhaid i mi ei wneud nesaf?
Mae’r gyfraith yn dweud ei bod yn ddyletswydd ar y sawl oedd yn gyfrifol am y cerbyd ar adeg y trosedd i enwi’r gyrrwr. Un ai fel y gyrrwr neu’r sawl a enwyd, mae arnoch ddyletswydd i ddweud pwy oedd yn gyrru’r cerbyd dan sylw. Bydd methu â darparu’r wybodaeth yn arwain at wysiad llys i’r perchennog, y gyrrwr a enwyd neu’r cwmni.
Fydd fy Hawliau Dynol yn cael eu torri os wyf yn ymateb i’r Hysbysiad hwn?
Na. Mae’n orfodol rhoi’r wybodaeth yn ôl y gofyn. Bydd peidio â gwneud hynny yn arwain at erlyniad.
Beth fydd yn digwydd os anwybyddaf yr Hysbysiad?
Bwriad cynnig hysbysiad cosb benodol yw rhoi cyfle i yrrwr ddatrys y mater yn syml ac yn gyflym heb orfod mynd i’r llys. Bydd peidio ag ymateb yn arwain at basio eich achos i’r llysoedd am fethu â chydymffurfio. Yng Ngogledd Cymru cyfartaledd y ddirwy a roddir mewn llys am y trosedd hwn yw £148 a 4 pwynt cosb.
Beth os penderfynaf fynd i’r llys?
Mae gennych hawl i herio’r trosedd mewn llys. Yr ynadon wedyn fydd yn penderfynu ynghylch dyfarniad unrhyw ddirwy neu bwyntiau cosb .Mae gan y llysoedd hawl i gynyddu unrhyw ddirwy neu bwyntiau cosb fel y gwelant yn briodol, yn ychwanegol at godi am gostau’r llys os cewch eich euogfarnu. Nid oes a wnelo’r Heddlu ddim â’r canlyniad terfynol.
Ydy’r Heddlu o ddifrif yn mynd i wastraffu amser y llys os anwybyddaf y ddirwy hon?
Mae’n ddyletswydd ar yr Heddlu i ddwyn troseddau honedig gerbron y llys.
Fydd angen i mi gyflwyno DWY RAN fy Nhrwydded Yrru?
Os oes gennych drwydded wrthrannol YN OGYSTAL Â thrwydded Cerdynllun yna rhaid cyflwyno’r DDWY ran gyda’r taliad. Yn y DG mae’r ddwy ran yn cyfrif fel trwydded gyfan.
Ydy hi’n bosibl talu fesul tipyn?
Nid yw’r cyfleuster hwn ar gael; dim ond y llys all drefnu hyn. Mae modd talu gyda cherdyn.
Nid oedd unrhyw arwyddion yn dangos cyfyngiad cyflymder felly sut y gwyddwn i ba gyflymder oedd yn dderbyniol?
 Yn yr achos hwn, yr esboniad mwyaf tebygol yw eich bod mewn parth 30mya. Mae Rheolau’r Ffordd Fawr yn nodi’n glir mai 30mya yw’r cyfyngiad cyflymder mewn ardal adeiledig gyda goleuadau ffordd oni bai bod arwydd yn nodi fel arall. Yr awdurdod lleol sy’n gyfrifol am osod arwyddion ar y ffordd fawr ond, yn ôl y gyfraith, ni all godi unrhyw arwyddion ychwanegol i ategu’r cyfyngiad cyflymder mewn parth 30mya.
Nid oeddwn yn ymwybodol o’r cyfyngiad cyflymder.
 Mae’n rhaid i bob gyrrwr yrru o fewn y terfynau cyfreithiol ac o fewn y cyfyngiadau a osodwyd. Uchafswm cyflymder, nid targed, yw’r cyfyngiad a osodir.
Pwy sy’n penderfynu ym mhle y dylid gorfodi cyfreithiau cyflymder?
Mae nifer o gyrff yn penderfynu hyn; yr heddlu, awdurdodau iechyd, cynghorau sir neu hyd yn oed drigolion trefi/pentrefi trwy gyfrwng cynrychiolydd lleol. Mae bob safle wedi’i leoli mewn un o’r lleoedd canlynol:
- Ar ffordd Siwrne Saff sydd â hanes o oryrru neu wrthdrawiadau
- Y tu allan i ysgol.
- Lle mae gwaith dros dro ar ffyrdd deuol.
Ydy’r safleoedd yn gyfreithlon?
Mae pob safle yn cydymffurfio â deddfwriaeth y llywodraeth a lleolir cerbydau Siwrne Saff ar ffyrdd sydd yn cael eu hysbysebu ymlaen llaw.
A gaf fi gopi o’r dystysgrif graddnodi?
Na, mae pob gwiriad yn gywir ac yn cwrdd â’r safonau angenrheidiol. Mae’r holl offer camera yn graddnodi ei hun ac nid yw’n gweithio os nad yw’r gwiriadau hunan-raddnodi yn gywir. Pwrpas y dystysgrif yw ategu achos yr erlyniad os ydych yn herio’r dystiolaeth ac yn mynd gerbron llys. NI fyddwch yn gallu newid eich meddwl a gofyn am gosb benodol bryd hynny.
Nid yw’r manylion ar fy nhrwydded yrru yn gywir, mae fy enw a/neu fy nghyfeiriad wedi newid.
Dylech wneud cais am drwydded newydd AR ÔL i chi ddelio â’r Hysbysiad hwn.
Mae gennyf drwydded yrru lân, fydd hyn yn cael ei ystyried?
 Na, ni ystyrir hanes gyrru blaenorol/trwydded lân.
Am ba hyd fydd y pwyntiau yn aros ar fy nhrwydded yrru?
Mae pwyntiau cosb yn ddilys am gyfnod o dair blynedd, ond ni ellir eu tynnu oddi ar eich trwydded yrru hyd nes y bydd pedair blynedd wedi mynd heibio. Ar ôl i’r cyfnod o bedair blynedd ddod i ben, gallwch wneud cais i’r DVLA am drwydded newydd.
Fyddai’n bosibl imi gael dirwy uwch heb bwyntiau cosb?
 Na. Os rhoddir cosb benodol i chi, y llywodraeth sy’n pennu’r ddirwy ac felly nid yw’n agored i drafodaeth. Y gosb a bennwyd gan y llywodraeth yw £60.00 a thri phwynt cosb.
A gaf i apelio yn erbyn yr Hysbysiad hwn?
 Cewch, ond mae’n RHAID i chi wneud hynny’n ysgrifenedig ac nid oes modd gwneud apêl dros y ffôn. Rhaid cofio y bydd unrhyw benderfyniad a wneir yn derfynol, ac y bydd yn rhaid i unrhyw apeliadau pellach fynd gerbron llys. PEIDIWCH â chyflwyno eich trwydded yrru a’ch taliad hyd nes y byddwch wedi cael ymateb i’ch llythyr. Ni all y Swyddfa Docynnau Ganolog ystyried apêl ar ôl i yrrwr/geidwad cofrestredig gydymffurfio â Hysbysiad.
Codi arian sydd wrth wraidd hyn i gyd.
 Mae’r arian a godir o ddirwyon yn cael ei ddefnyddio i ehangu ymgyrch Siwrne Saff i gynnwys ffyrdd eraill yng Ngogledd Cymru. NI ELLIR ei ddefnyddio i wneud unrhyw beth arall. Mae ffyrdd yn cael ei hysbysebu ymlaen llaw ac arwyddion clir yn cael eu codi arnynt. Mae faniau Siwrne Saff a’r camerâu sefydlog yn weladwy iawn. Ar hyd a lled y DU mae’r partneriaethau hyn wedi dangos fod gosod camerâu mewn lleoliadau penodol yn peri gostyngiad sylweddol yn y nifer o bobl sy’n cael eu lladd a’u hanafu ar y ffyrdd.
   




© Hawlfraint Siwrne Saff 2001 - 2009
llun top: size-isnt-everything.co.uk